Яңалыклар


18.10.2017 Татарстан Республикасы Президенты «Strategic Marketing & Exhibitions» компаниясе җитәкчесе Дауд Әль-Шезави белән очрашты
Бүген Татарстан Республикасы Президенты Рөстәм Миңнеханов «Strategic Marketing & Exhibitions» компаниясе җитәкчесе Дауд Әль-Шезави белән очрашты. Рөстәм Миңнеханов Дауд Әль-Шезави белән берничә кат очрашканы бар. Әль-Шезави - Дубайда ел саен уздырыла торган Инвестицион форум президенты. Әлеге форум эшендә Татарстан делегациясе актив катнаша. Аның KazanSummit халыкара икътисадый саммитында катнашу өчен Казанга 2016 елда һәм быел килгәне бар. «Strategic Marketing & Exhibitions» компаниясе бүгенге көндә Берләшкән Гарәп Әмирлекләрендә күргәзмәләр һәм конференцияләр оештыручыларның алдынгысы, шул исәптән ул WorldSkills Abu Dhabi 2017 ярышларын да оештырды. Әңгәмә барышында Рөстәм Миңнеханов Абу-Дабидагы һөнәри осталык чемпионатын оештыру дәрәҗәсен югары бәяләде. Дауд Әль-Шезави Казанда 2019 елда узачак әлеге чемпионатның да иң югары дәрәҗәдә узачагына ышануын белдерде. Яклар 2019 елда Казанда WorldSkills чемпионатын уздыру мәсьәләләрендә хезмәттәшлек мөмкинлекләре һәм алга таба "Казан-ЭКСПО" күргәзмә үзәген, Идел буе төбәкләрендә иң эре күргәзмә үзәге буларак дөнья дәрәҗәсендә алга этәрү турында сөйләштеләр. Очрашуда ТР Премьер-министры урынбасары Шамил Гафаров, ТР Премьер-министры урынбасары - сәнәгать һәм сәүдә министры Альберт Кәримов, ТР Президенты ярдәмчесе, «КАЗАН ЭКСПО» ҖЧҖ генеральдиректоры Роберт Миңневәлиев, ТР Президенты тышкы элемтәләр департаменты директоры урынбасары Марат Гатин, "Ак Барс" ХК АҖ генераль директоры Иван Егоров катнаштылар.  
18.10.2017 Рөстәм Миңнеханов WorldSkills Abu Dhabi 2017 ярышлары барышын күзәтте
Бүген Татарстан Республикасы Президенты Рөстәм Миңнеханов WorldSkills Abu Dhabi 2017 һөнәри осталык буенча ярышларның төрле мәйданчыкларында булды һәм чемпионат уза торган Абу-Даби Милли күргәзмә үзәге инфраструктурасын өйрәнде. Дөнья чемпионаты Абу-Дабида (БГӘ) быел 14-19 октябрь көннәрендә уза. Ярышларда 52 компетенция буенча 76 илдән 1200 дән артык һөнәр осталары һәм 1500 белгеч катнаша. Катнашучылар һөнәрләр буенча алты өлешкә бүленеп ярыша: төзелеш, ИТ-технологияләр, сәнгать һәм дизайн, сәнәгать производствосы, хезмәт күрсәтү һәм гражданнар транспортында хезмәт күрсәтү. Ярышларның төп мәйданчыгы - Abu Dhabi National Exhibition Centre (ADNEC) күргәзмә комплексы. Россия җыелма командасында 22 төбәктән 58 кеше бар, шул исәптән Татарстан Республикасыннан 7 компетенция буенча 8 кеше катнаша. Дөнья чемпионатының ачылу тантанасы 14 октябрь көнне Du Arena концертлар мәйданында узды. Ябылу тантанасы да шунда 19 октябрьдә үтәчәк. Тантана кысаларынңа Россия һәм Казан шәһәре презентациясен күрсәтү көтелә. WorldSkills Kazan 2019 оештыру комитеты сәламләү сүзе белән чыгыш ясыячак, шулай ук Россия Федерациясенә WorldSkills флагын тапшыру тантанасы да була.  
09.10.2017 Татарстан Президенты: Дәүләт яшьләр сәясәтен гамәлгә ашыру – безнең эшчәнлектә һичшиксез өстенлекле юнәлеш
Дәүләт яшьләр сәясәтен гамәлгә ашыру – безнең эшчәнлектә һичшиксез өстенлекле юнәлеш. Бүген бу хакта Татарстан Республикасы Президенты Рөстәм Миңнеханов Татарстан Республикасы Террорчылыкка каршы көрәш комиссиясенең яшьләр тирәлегенә террорчылык һәм экстремизм идеологиясе, милли һәм дини экстремизм һәм ксенофобия үтеп керүгә, шулай ук җинаятьчел субкультурага каршы көрәш мәсьәләләренә багышланган утырышында хәбәр итте. Чара Казан Кремлендә узды.  Утырыш эшендә Татарстан Республикасы Дәүләт Киңәшчесе Минтимер Шәймиев, Татарстан Республикасы Премьер-министры Алексей Песошин, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Президенты Аппараты Җитәкчесе Әсгать Сәфәров, Террорчылыкка каршы комиссия әгъзалары, республика министрлыклары, ведомстволары, муниципаль берәмлекләр һәм оешмалар җитәкчеләре, территориаль федераль структуралар вәкилләре катнашты.
09.10.2017 Nores Watertech Норвегия компаниясе һәм «Идея» технопаркы Татарстанда сөләйман балыгы җитештерүче завод проекты төзелеше буенча килешү имзаладылар
Бүген Казанда Nores Watertech Норвегия компаниясе һәм «Идея» инновацион-җитештерү технопаркы Татарстанда елына 3 мең тонна күләмендә сөләйман балыгы җитештерүче завод проекты төзелеше буенча инвестицияләр нияте турында килешү имзаладылар Документ "Корстон" КСККнда бүген ачылган 47 нче Балыкчылык буенча Россия-Норвегия уртак комиссиясендә имзаланды. Килешүгә имзаларын "Идея" технопаркы генераль директоры вазыйфаларын башкаручы Олег Ибраһимов һәм Норвегия компаниясе вәкиле Тронд Вегер куйдылар.  Чарада Татарстан Республикасы Президенты Рөстәм Миңнеханов, Балыкчылык буенча федераль агентлык җитәкчесе Василий Соколов, ТР Премьер-министры урынбасары - авыл хуҗалыгы һәм азык-төлек министры Марат Әхмәтов һәм башка рәсми затлар катнашты. 
05.10.2017 Татарстан Президенты: Авыл хуҗалыгы – республика икътисадының төп тармагы
Авыл хуҗалыгы – республика икътисадының төп тармагы һәм республиканың азык-төлек иминлегенең нигезе булып тора. Бүген бу хакта Татарстан Республикасы Президенты Рөстәм Миңнеханов Авыл хуҗалыгы һәм эшкәртү сәнәгате хезмәткәре көненә багышланган тантанада хәбәр итте.  Казан теннис академиясендә узган чарада Татарстан Республикасы Дәүләт Киңәшчесе Минтимер Шәймиев, Татарстан Республикасы Премьер-министры Алексей Песошин, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Президенты Аппараты Җитәкчесе Әсгать Сәфәров, Татарстан Республикасы Премьер-министры урынбасары-Татарстан Республикасы авыл хуҗалыгы һәм азык-төлек министры Марат Әхмәтов, алдынгы районнар җитәкчеләре, тармакның иң яхшы механизаторлары һәм ветераннары катнашты. 
03.10.2017 Рөстәм Миңнеханов: Татарстан Сингапур компанияләре белән хезмәттәшлеккә ачык
Татарстан Республикасы Президенты Рөстәм Миңнеханов Сингапур Республикасы сәүдә һәм сәнәгать министры - Сингапур Республикасының милли үсеше министры Ко По Кун һәм Сингапур Республикасы Премьер-министры урынбасары - Сингапур Республикасы икътисадый һәм социаль үсеше мәсьәләләре буенча координацияләүче министры Тарман Шанмугаратнам белән очрашты. Ике яклы очрашу "Татарстан-Сингапур: хезмәттәшлек мөмкинлекләре" түгәрәк өстәле форматында киңәйтелгән составта дәвам итте. Рөстәм Миңнеханов сәламләү сүзендә белдергәнчә, Татарстан Сингапур белән эшлекле хезмәттәшлекне үстерергә тели һәм инвесторларга ачык. "Республика уртак проектларны гамәлгә ашыруда төрлечә ярдәм итәргә әзер. Без сезне үзебездә кунакта күрергә шат булабыз, һәм эшлекле максат белән генә түгел, ә турист буларак та сингапурлыларны үзебездә күрергә шат булабыз. Әйтик, киләсе 2018 елда Казанда бөтен Россия белән бергәләп футбол буенча дөнья чемпионатын кабул итәбез", - диде ул. Очрашуда ТР Премьер-министры урынбасары - мәгълүматлаштыру һәм элемтә министры Роман Шәйхетдинов һәм ТР Инвестицион үсеш агентылыг җитәкчесе Талия Миңнуллина Татарстанда мәгълүмат технологияләре үсеше һәм инвестцион проектлартурында хәбәр иттеләр. Сингапур бизнесы вәкилләре Россия төбәкләре белән хезмәттәшлекне үстерергә теләгән үз компанияләре презентацияләрен тәкъдим иттеләр. Түгәрәк өстәл барышында мәгариф, төзелеш, азык-төлек сәнәгатте, косметика җитештерүче, нефть-газ секторы һәм консалтинг өлкәсендә эшләүче компанияләр тәкъдим ителде. Рөстәм Миңнеханов эш сәфәре ахырында Сингапур Республикасының Милли үсеше министрылыгы каршындагы Шәһәрне төзекләндерү агентылыгы эшчәнлеге белән танышты. Агентлык шәһәр төзү органы һәм шәһәр-дәүләт өчен зур әһәмияткә ия. Сингапурда халык саны гаять зур, анда җирне дөрес куллану мәсьәләсе аеруча кискен, җир җитмәү шартларында булган территорияләрне аеруча дөрес кулланырга кирәк. Агентлык шәһәр төзү планнарын ясый, шәһәр дизайнын яхшырту эшен дә алып бара.  
03.10.2017 Рөстәм Миңнеханов Сингапур Республикасы Премьер-министры Ли Сянь Лун белән очрашты
Бүген эш сәфәре кысаларында Татарстан Республикасы Президенты Рөстәм Миңнеханов Сингапур Республикасы Премьер-министры Ли Сянь Лун белән очрашты. Әңгәмә барышында яклар Россия белән Сингапур арасында мөнәсәбәтләрне ныгыту әһәмиятен ассызыкладылар: "Күп өлкәләрдә багланышларны киңәйтү, аеруча сәүдә-икътисадый хезмәттәшлек өлкәсендә, модернизация һәм инновация, энергетика һәм махсус икътисадый зоналар идарәсендә, идарәче кадрлар әзерләүдә ике илнең дә игътибар үзәгендә. Болар барысы да Сезнең Россия Президенты Владимир Владимирович Путин белән былтыр Сочида узган Россия – АСЕАН саммитындагы очрашуда ачык чагылды. Татарстан ике ил мөнәсәбәтләре кысаларында Сингапур белән элемтәләрне киңәйтүгә зур игътибар бирә. без әлеге эштә региональ дәрәҗәдә актив рәвештә катнашырга әзер”, - дип ассызыклады Татарстан Президенты.
02.10.2017 Татарстан Республикасы Президенты Сингапур Республикасына эш сәфәренә килде
Бүген көннең икенче яртысында Татарстан Республикасы Президенты Сингапур Республикасына эш сәфәренә килде. Чанги халыкара аэропортында Рөстәм Миңнехановны Россия Федерациясенең Сингапур Республикасында Гадәттән тыш һәм Тулы вәкаләтле Илчесе Андрей Татаринов каршы алды. Татарстан Республикасы делегациясе составында: ТР Премьер-министры урынбасары - мәгълүматлаштыру һәм элемтә министры Роман Шәйхетдинов, ТР Президенты ярдәмчесе Наталия Фишман, ТР Инвестицион үсеш агентлыгы җитәкчесе Талия Миңнуллина, ТР Президентының Тышкы элемтәләр департаменты директоры Эдуард Хәбибуллин, ТР сәнәгать һәм сәүдә министры урынбасары Денис Вәлиев, Казан шәһәренең башкарма комитеты җитәкчесенең беренче урынбасары Дамир Фәттахов, "АК БАРС" банк ГАҖ идарәсе рәисе Зөфәр Гәрәев һәм башкалар.
01.10.2017 Рөстәм Миңнеханов РФ вице-премьеры Аркадий Дворковичның Япония Премьер-министры Синдзо Абэ белән очрашуында катнашты
Татарстан Республикасы Президенты Рөстәм Миңнеханов Россия делегациясе составында Япониягә эш сәфәре (2017 елның 1-2 октябре) барышында Россия Федерациясе Хөкүмәте Рәисе урынбасары Аркадий Дворковичның Япония Премьер-министры Синдзо Абэ белән очрашуында катнашты. Очрашу «Җәмгыятьтә фән һәм технологияләр» халыкара форумы (STS-форум) кысаларында узды.   Яклар икътисад өлкәсендәге ике яклы мөнәсәбәтләр турында, шулай ук халыкара сәясәт мәсьәләләре турында фикер алыштылар. Япония ягыннан очрашуда – илнең Россия белән икътисадый хезмәттәшлекне үстерү министры итеп билгеләп куелган (2016 елның 1 сентябреннән) Икътисад, сәүдә һәм сәнәгать министры Хиросигэ Сэко, Россия ягыннан Татарстан Республикасы Президенты Рөстәм Миңнеханов, Калуга өлкәсе Губернаторы Анатолий Артамонов та катнашты.